1/15/2007

「每日一hae」八:提不起勁

最近個多月,我的「提不起勁症」又發作。

在十二月底本來拿了數天年假,但結果,新買的書沒有看,積存的影碟也沒有看,大部分時間都是躺在床上,即使已睡得不能再睡,也繼續躺著。

雖說已經覺悟到自己是「二打六」,決定不再去胡思亂想那些自己想不出答案的問題,但有時,即使你不刻意去想,這些思緒還是會不時突襲的。

Libertine一片中,有一幕戲講述男主角John(Johnny Depp飾)在女主角主演的舞台劇正在上演時,到後台去找她,期間碰到一名他鄙視的男演員時,忍不住揶揄對方一番,對方於是以急著更衣出場為理由,揮袖而去,John對他說:「This is what I envy in you stage people. You make time seem so important. I must change my clothes now! I must make my entrance now! But life is not a succession of "urgent now"s. It is a listless trickle of "Why should I"s.」

躺著躺著,腦袋內便盡是這些「"Why should I"s」。想想想,結果仍是想不通,不知道為何要寫、為何要說、為何要活,結果便提不起勁去寫、提不起勁去說、提不起勁去活。

不過,提不起勁去寫、去說,跟提不起勁去活的分別是,你提不起勁去寫、去說,便自然會不寫不說,但你即使提不起勁去活,卻會仍然活著的,即使只是行屍走肉地活著。


後記:此文本應寫於十二月底,但當時實在太提不起勁,結果打了一兩句便放棄了。上周跟一名得知我近況的友人MSN時,友人問:「你會交代點解咁耐無新post嗎?」我說:「本來都寫左d,但打左幾句就無心機打,篇野依家都唔update。」友人說:「唔update唔緊要,大家都係想見到你有新post。」雖然現在病情已好轉的我,剛才補寫此文時,總覺得有點無病呻吟,但一想到各界友人不難不棄的「追數」時,又覺得即使是難為情,也應該約略向大家交代一下的。那就讓我以這篇由06年寫到07年的「籌備經年」之作,來讓大家知道我尚未拉柴,亦沒有遭人綁架,更加並非存心「呃comments」的。

12 comments:

Chris said...

我分明日日都有睇下你個blog先可以做第一個留言o個個。仲咩冇心機?自己寫野總好過做公司d野

屎 said...

我提不起勁做喜歡的事情
我行街睇戲沒有約定
周遭的一切在各安天命
我隨身都帶一樽酒精...

送你一首假音人"不起勁"
假音靚聲人人啱聽~
你精我都精
飲杯竹葉青!

過路貓小姐 said...

好囉...
你終於肯返來囉..^^

我都係日日提不起勁的(esp.放假的時候),不過當回到公司忙到天昏地暗時,又會像回個沒事人般,又會好想放假。(一個惡性循環..!!..><"..)
試0下食一頓人間美味啦(回魂飯),就咩精神都返晒黎架啦~~呵呵
喵噢~

林時拉夫斯基 said...

chris:
多謝棒場!不過,家陣又唔係爭上頭柱香,你霸到頭位都無必要咁得戚 :P

屎:
做事我提不起勁
出街我喜歡約定
免得撲空損心情

你說贈我”不起勁”
借問我可怎樣聽?
難道是千里傳聲?

過路貓小姐:
我都想可以有個咁有規律o既惡性循環~ =.="
「回魂飯」?是《回魂夜》的續集嗎? XD

K. said...

好久不見。原來你尚在人間,可喜可賀。

李莫愁 said...

講真,你果d「提不起勁症」,同我另外兩個朋友比,真係小巫見大巫。佢地其中一個失業十年,最近一諗起自己嘅存在就會停止心跳,而另一個「提不起勁」左十三年,堅稱自己係「支離破碎」嘅人。唔係話要鬥「邊個夠我慘」,只係想俾個參考座標你睇:論「行屍走肉」,你其實資歷尚淺,咪誇大自己嘅病情,無益架。遲d果位心跳停頓嘅仁兄會貼篇日記講下病情,鬥慘你恐怕要行遠d,想做活死人,見過古墓派掌門人未先?

cr2superlover said...

終於見到你既新post,希望唔好係因為要'應酬'我們而難為左你'提起勁'去寫blog,不過仍然期待的 '忍笑機能失調症'的'不直看廣告'篇。

順便講句,我家中的電腦中了毒,我開始感受到你當日家中無電腦的日子有幾咁難受。

林時拉夫斯基 said...

k.:
真的好久不見了,早陣子連我自己也以為自己已不在人世。

李莫愁:
我打算post呢篇o野o個日,咁o岩撞正「隱蔽青年增至1.8萬」o既新聞,當時我都有諗過,我o既隱蔽程度咁低,獻醜不如藏拙啦。不過,正如我在「後記」中所講,寫呢篇野,都係為左交代下近況(其實都唔近),唔夠隱蔽其實都唔緊要,反正我不嬲都係「蔽翳青年」而非「隱蔽青年」。
我只係偶爾去古墓hae下o既「盜墓者羅蘭」,未有機會拜見古墓派掌門人,期待佢分享下心得啦。

cr2superlover:
你屋企電腦中毒都唔緊要啦,反正你不嬲都係o係公司睇blog同打blog架啦~ XD

Edith said...

係唔係呢期我生活圈子狹窄左呢?
定係你真係好耐無寫post?
我一睇返你寫既post, 我就覺得好好笑~
一掃悶氣~!
雖然我成日都話有個FYP等住我
但係我今日都hea左好耐........

林時拉夫斯基 said...

「人地都已經咁慘,你仲笑得落o既?」(《92黑玫瑰對黑玫瑰》的梁家輝腔)

你死喇,你梗係惹左我o既「陰陰嘴笑」病,搞到咩都笑一餐~

FYP簡直係酷刑(最折磨o既唔係做緊o個陣,係一直拖住唔做o既罪惡感),希望你快d獲「提得起勁神」眷顧啦~

粉絲A said...

你又消失成個月啦...咁搞法,又要過埋新春節先寫?人氣急跌啦,我又唔忍心見你個博客無客,落得冷冷清清悽悽慘慘戚戚...
唯有繼續比你呃comment,你呃得開心,我又比你呃得稱心..

c said...

可能你呢個"每月一hae"系列要改名,改做"每月一hae"又或者"得閒先hae"